Cydgynhyrchu Dyfodol Cryf ar gyfer AI a Thechnolegau Blaengar gyda TechFirst Cymru

Yn CyberFirst Cymru, rydym yn gwybod mai’r rhaglenni cryfaf yw’r rhai sy’n cael eu llywio gan y bobl y maent yn eu gwasanaethu. Mae hynny’n golygu gwrando ar ddysgwyr, athrawon, partneriaid diwydiant a’r gymuned addysg ehangach ledled Cymru. Rhoddodd ein gwaith diweddar gyda Rhwydwaith Cydgynhyrchu Cymru gyfle inni wneud hynny’n union, gan ddod â thua 100 o gyfranogwyr ynghyd i fyfyrio ar yr hyn sy’n gweithio’n dda, yr hyn sydd angen ei ddatblygu, a’r hyn sydd ei angen ar bobl ifanc yng Nghymru gan ddyfodol addysg technolegau blaengar.

Yr hyn a ddaeth i’r amlwg yn glir oedd ymdeimlad gwirioneddol o falchder yn y cynnydd a wnaed eisoes. Soniodd dysgwyr yn frwdfrydig am weithgareddau ymarferol, cystadlaethau, modelau rôl o’r diwydiant a phrofiadau a helpodd i wneud seiber yn fwy perthnasol a byw. Tynnodd athrawon sylw at fwy o hyder, mwy o ddiddordeb mewn cyfrifiadura, ac effaith gadarnhaol ar ddysgwyr sy’n dewis Cyfrifiadureg, yn enwedig merched. Cydnabu partneriaid diwydiant hefyd werth cysylltu â phobl ifanc yn gynharach a dangos iddynt yr ystod o gyfleoedd sydd ar gael.

Wrth i’r darlun cenedlaethol barhau i esblygu ac wrth i’r sgwrs edrych fwyfwy tuag at TechFirst, mae’r canfyddiadau hyn yn cynnig rhywbeth pwysig. Maent yn dangos bod sylfaen gadarn i adeiladu arni yng Nghymru. Maent hefyd yn dangos y dylid llunio’r cam nesaf yn ofalus, gan roi ffocws clir ar yr hyn y mae dysgwyr, ysgolion a phartneriaid yn dweud sydd bwysicaf. Bwriedir i TechFirst adeiladu ar lwyddiant CyberFirst, gan ehangu i gynnwys ystod ehangach o dechnolegau blaengar tra’n parhau i gefnogi pobl ifanc i ddatblygu sgiliau digidol, hyder wrth ddefnyddio deallusrwydd artiffisial (AI), a dealltwriaeth o yrfaoedd y dyfodol. Croesawyd y cyfeiriad ehangach hwn gan lawer o’r cyfranogwyr, ond gyda neges yr un mor gryf y dylai seiber barhau i fod yn sylfaen ddibynadwy a gweladwy.

Yr hyn a ddywedodd y cyfranogwyr wrthym

Daeth nifer o themâu i’r amlwg yn gyson drwy gydol yr ymgysylltu:

• Mae deallusrwydd artiffisial (AI) bellach yn faes o ddiddordeb mawr ac ansicrwydd.

  Fe’i codwyd gan bron bob grŵp, gan ddangos pa mor bwysig yw helpu dysgwyr ac athrawon i feithrin hyder mewn amgylchedd sy’n newid yn gyflym.

• Mae seiber yn parhau i fod yn borth pwysig i ddysgu am dechnoleg yn ehangach ac i yrfaoedd yn y maes

  Roedd cyfranogwyr yn gwerthfawrogi’r ffordd y mae CyberFirst Cymru yn helpu i wneud pynciau technegol yn ymarferol, yn ddiddorol ac yn berthnasol.

• Mae athrawon am gael mwy o gymorth i gadw i fyny â’r datblygiadau.

  Gofynnodd ysgolion am fwy o adnoddau cyfredol, mwy o gymorth ymarferol yn yr ystafell ddosbarth, a mwy o gyfleoedd dysgu proffesiynol.

• Mae dilyniant yn bwysig.

  Roedd cyfranogwyr am weld llwybrau cliriach o ymgysylltu cynnar ymlaen at ddewisiadau TGAU, opsiynau ôl-16, prentisiaethau, addysg bellach a chyflogaeth.

• Rhaid i gynhwysiant barhau’n ganolog.

  Roedd galw cryf am gyrhaeddiad daearyddol ehangach, mwy o ddarpariaeth cyfrwng Cymraeg, a gwell mynediad i ddysgwyr sy’n wynebu rhwystrau ariannol, cymdeithasol neu ymarferol.

related

AI SAFE – Fframwaith ar gyfer Dysgwyr ac Athrawon

Rydym wedi creu adnodd AM DDIM sy’n seiliedig ar dystiolaeth i helpu dysgwyr ac athrawon i lywio’r cyfnod newydd a deinamig hwn o ddysgu ac astudio yn ddiogel ac yn hyderus.

Learn More

Un o’r canfyddiadau cryfaf o’r gwaith oedd bod angen sgiliau technegol ac an-dechnegol ar bobl ifanc. Soniodd cyfranogwyr yn gadarnhaol am y wybodaeth a gafwyd mewn meysydd megis seiberddiogelwch, deallusrwydd artiffisial, codio, cryptograffeg a fforensig. Ar yr un pryd, roedd athrawon a chyflogwyr yn rhoi’r un gwerth ar ddatrys problemau, gwaith tîm, gwytnwch, cyfathrebu a hyder. Dyma’r sgiliau sy’n helpu pobl ifanc i lwyddo nid yn unig yn yr ystafell ddosbarth, ond hefyd mewn gweithleoedd go iawn ac mewn gyrfaoedd yn y dyfodol.

Tynnodd y trafodaethau sylw hefyd at bwysigrwydd canfyddiadau a safbwyntiau. Dywedodd llawer o ymatebwyr fod seiber a thechnoleg yn dal i gael eu hystyried yn rhy aml fel meysydd ar gyfer grŵp cul o ddysgwyr. Mae hynny’n parhau i fod yn rhwystr mewn ysgolion a thu hwnt. Y neges galonogol oedd bod y safbwyntiau hynny’n dechrau newid pan fydd dysgwyr yn cymryd rhan yng ngweithgareddau CyberFirst.

I athrawon, roedd y neges yn ymarferol ac yn gyson. Mae llawer o ysgolion yn gweithio’n galed mewn amgylchedd sy’n newid yn gyflym, yn aml gyda chyfyngiadau o ran amser, offer a mynediad at gymorth arbenigol. Roedd galw mawr am adnoddau parod i’w defnyddio, cynnwys mwy cyfredol, a chysylltiadau cryfach rhwng ysgolion, colegau, prifysgolion a diwydiant. Mae’r math hwn o gymorth cydgysylltiedig yn hanfodol os yw addysg seiber a thechnolegau blaengar am barhau i fod yn berthnasol, yn gynhwysol ac yn gynaliadwy ledled Cymru.

Thema allweddol arall oedd pwysigrwydd cyrraedd dysgwyr ar yr adegau cywir yn eu taith ddysgu. Mae CyberFirst Cymru eisoes wedi bod yn gwneud hyn yn effeithiol drwy ei fframwaith ymgysylltu, sy’n cefnogi dysgwyr ar wahanol gamau gyda chyfleoedd sy’n briodol i’w hoedran ac sy’n meithrin diddordeb, hyder a dilyniant dros amser. Cadarnhaodd adborth y cyfranogwyr werth y dull hwnnw, gan dynnu sylw hefyd at yr angen i ehangu ei gyrhaeddiad fel y gall mwy o bobl ifanc ledled Cymru elwa. Roedd cefnogaeth arbennig i ehangu mynediad yn gynharach ac yn ddiweddarach yn nhaith y dysgwr, ynghyd â gwneud llwybrau ôl-16 yn fwy gweladwy, yn enwedig llwybrau technegol a galwedigaethol, fel y gall mwy o ddysgwyr weld yr ystod lawn o gyfleoedd sydd ar gael ym maes seiber a thechnoleg.

Edrych ymlaen gyda hyder

ae’r canfyddiadau’n cynnig neges glir a chytbwys ar gyfer y dyfodol. Ceir cefnogaeth gref i ehangu’r sgwrs ynghylch technolegau blaengar, yn enwedig ym maes deallusrwydd artiffisial ac eraill sy’n datblygu. Ar yr un pryd, mae awydd clir i ddiogelu’r hyn sydd eisoes yn gweithio’n dda. Mae seiber, un o’r saith technoleg flaengar a ddiffinnir gan Lywodraeth y DU, yn parhau i fod yn un o’r ffyrdd mwyaf effeithiol o ennyn diddordeb, meithrin hyder ac agor llwybrau i’r byd digidol ehangach. Yng Nghymru, mae’r sylfaen honno’n bwysig. Mae ganddi hygrededd ymhlith dysgwyr, athrawon a diwydiant, ac mae’n darparu sail gadarn ar gyfer twf pellach.

Wrth edrych tua dyfodol addysg dechnolegol yng Nghymru, nid gwneud mwy yn unig yw’r cyfle. Y cyfle yw gwneud mwy gyda phwrpas. Mae hynny’n golygu cadw cynhwysiant wrth wraidd y gwaith, cefnogi ysgolion mewn ffyrdd ymarferol, ehangu mynediad ledled y wlad, a sicrhau bod pobl ifanc yn gallu gweld llwybr ymlaen sy’n berthnasol i’w bywydau a’u huchelgeisiau. Mae hefyd yn golygu parhau i weithio mewn partneriaeth, oherwydd bydd dyfodol Cymru ar ei gryfaf pan gaiff ei adeiladu gyda’n gilydd.

Hoffem ddiolch i bawb a gyfrannodd eu hamser, eu syniadau a’u gonestrwydd i’r gwaith hwn. Bydd eu mewnwelediadau yn helpu i lunio’r camau nesaf ac yn cryfhau ein huchelgais ar y cyd i greu mwy o gyfleoedd, mewn mwy o leoedd, i fwy o bobl ifanc ledled Cymru.