Yn CyberFirst Cymru, rydyn ni’n aml yn siarad am fanteision ein rhaglen – ac i fod yn deg, rydyn ni’n meddwl eu bod nhw’n eithaf gwych. Ond yn lle eich bod chi’n clywed gennym ni unwaith eto, roeddem yn meddwl ei bod hi’n bryd pasio’r meicroffon i rywun sydd ar y rheng flaen. Dyma Carl Wyatte, athro cyfrifiadureg brwdfrydig ac arweinydd balch y Wobr Aur CyberFirst. Yn y cyfweliad hwn, mae Carl yn rhannu sut mae CyberFirst wedi trawsnewid cyfrifiadureg yn ei ysgol, wedi ysbrydoli disgyblion, ac wedi agor drysau i gyfleoedd yn y byd go iawn — hyn oll o safbwynt athro.
Mae dod yn Ysgol Aur CyberFirst wedi trawsnewid ein cwricwlwm cyfrifiadureg ac ymgysylltiad disgyblion. Un o’r canlyniadau mwyaf gwerthfawr yw’r bartneriaeth gyda Airbus, sydd wedi darparu profiadau dysgu bythgofiadwy ac ymarferol yn y byd go iawn. O ddosbarthiadau meistr mewn fforenseg digidol i ymweliadau trochi, mae disgyblion bellach yn gwneud cysylltiadau gwirioneddol rhwng eu dysgu yn yr ystafell ddosbarth a gyrfaoedd yn y diwydiant.
“I lawer o’n disgyblion, dyma’r tro cyntaf iddyn nhw weld eu hastudiaethau cyfrifiadureg yn cael eu cymhwyso yn y byd go iawn— ac mae’n drawsnewidiol.”
Mae Fframwaith Ymgysylltu CyberFirst wrth wraidd ein strategaeth. Mae’n cynnig ymyriadau strwythuredig sy’n addas i’r oedran ac yn cyd-fynd yn berffaith â’n nod o gynyddu niferoedd a hyrwyddo amrywiaeth mewn Cyfrifiadureg. Rydym wedi defnyddio mentrau fel y cyrsiau Trailblazers and Adventurers fel arfau recriwtio wedi’u targedu — yn enwedig ar gyfer disgyblion sy’n ansicr am ddewis Cyfrifiadureg ar lefel TGAU.
Mae’r Gystadleuaeth Merched CyberFirst, yn arbennig, wedi creu llawer o gyffro. Rydyn ni wedi cyrraedd y rownd derfynol genedlaethol dair gwaith ac wedi ennill yn 2023. Mae’r digwyddiadau hyn nid yn unig yn hybu cyfranogiad, ond hefyd yn cynyddu cynrychiolaeth merched yn sylweddol – mae 40% o’n blwyddyn 10 eleni’n ferched.
Mae CyberFirst yn mynd y tu hwnt i gystadlaethau. Mae rhaglenni fel Pathways yn rhoi cipolwg i ddisgyblion ar ystod lawn o yrfaoedd ym maes seiber a’r llwybrau i’w dilyn – gan gynnwys prentisiaethau, prifysgol a chyflogaeth uniongyrchol. Rydyn ni hefyd wedi ymgorffori themâu seiberddiogelwch yng nghwricwlwm CA3 – o ymchwiliadau OSINT i efelychiadau ymateb i ymosodiadau – gan ddatblygu sgiliau technegol a meddwl beirniadol.
“Mae dod yn ysgol CyberFirst wedi newid y ffordd mae ein disgyblion yn edrych ar eu dyfodol.”
Mae ein perthynas ag Airbus yn dod â Chwricwlwm i Gymru yn fyw drwy ddarparu profiadau Gyrfaoedd a Pherthnasol i Waith (CWRE) ystyrlon. Rhoddodd ymweliadau diweddar â safle Airbus Casnewydd gyfle i ddisgyblion weld labordai deallusrwydd artiffisial (AI), cymryd rhan mewn gweithgareddau cryptoleg ac ymgysylltu’n uniongyrchol ag interniaethau. Gadawodd rhai myfyrwyr yn benderfynol o ddilyn gyrfaoedd yn y sector seiber.
Mae’r manteision yn ymestyn y tu hwnt i ddeilliannau disgyblion. Fel adran, rydym wedi adeiladu fframwaith cynaliadwy sy’n integreiddio addysg seiber yn y cwricwlwm, diwylliant yr ysgol, a gwaith estyn braich — gan gynnwys sesiynau pontio gyda’n hysgolion cynradd lleol.
I ysgolion sy’n ystyried y wobr, dechreuwch drwy gasglu tystiolaeth o’ch holl weithgareddau seiber, a chynnwys eich tîm arweinyddiaeth o’r dechrau. Mae’r broses yn ddichonadwy gyda dull rhagweithiol — ac mae’r wobr yn werth chweil.
“Mae’r wobr yn fwy na bathodyn — mae’n gatalydd ar gyfer newid.”
Mae CyberFirst yn mynd i’r afael â bwlch sgiliau cenedlaethol hanfodol ac yn cynnig llwybrau go iawn i fyfyrwyr lleol – yn enwedig mewn ardaloedd difreintiedig – i yrfaoedd gwerth uchel. Gyda De Cymru yn dod yn ganolbwynt i’r diwydiant seiber, mae’r rhaglen hon yn darparu cyfleoedd amserol ac ymarferol i ysbrydoli’r genhedlaeth nesaf o weithwyr proffesiynol ym maes seiber.
Sut alla’ i wneud cais am wobr CyberFirst?
Bydd angen ichi lenwi cais – byddwn yn eich cynorthwyo trwy’r holl broses gydag adolygiadau drafft ac arweiniad gam wrth gam. Ni cheir dyddiad cau penodedig, felly gallwch gyflwyno eich cais pa bryd bynnag y byddwch yn teimlo’n hyderus i wneud hynny!
