Ffrindiau Newydd, Heriau Mawr, a Llawer iawn o Hwyl! 

Mae’r Gystadleuaeth Merched CyberFirst ar gyfer Blwyddyn 8, a redir gan y Ganolfan Genedlaethol Seiberddiogelwch, wedi’i chynllunio i ysbrydoli chwilfrydedd a hyder mewn cyfrifiadureg a seiberddiogelwch ymhlith merched ifanc. Bob blwyddyn, mae miloedd o ferched o bob cwr o’r DU yn cymryd rhan mewn heriau sy’n profi eu gallu i ddatrys problemau, gweithio’n dîm ac arddangos creadigrwydd. I lawer, dyma’r tro cyntaf iddynt gael cipolwg gwirioneddol ar fyd cyffrous seiber. Yn yr erthygl hon, cawn glywed yn uniongyrchol gan Amiyah—enillydd blaenorol a chyfranogwr balch—sy’n rhannu sut y daeth y gystadleuaeth yn brofiad a newidiodd ei thaith, yn yr ystafell ddosbarth ac y tu hwnt. 

Pan ofynnwyd iddi am ei phrofiad yn Nigwyddiad Cystadleuaeth Merched CyberFirst ar gyfer Blwyddyn 8, rhannodd Amiyah sut yr oedd yn llawer mwy na dim ond cystadleuaeth—roedd yn gyfle i ddysgu, bondio ac ysbrydoli. 

“Y rhan orau o’r gystadleuaeth oedd y swper—cefais gyfle i siarad â menywod oedd yn ffynnu ym maes Seiber.” 

“Y rhan orau i mi o’r gystadleuaeth oedd y swper, heb os. Peidiwch â’m camddeall—roeddwn i wir wedi mwynhau’r heriau hefyd, ond roedd eistedd i lawr a chael sgwrs â menywod blaenllaw ym maes Seiber yn brofiad bythgofiadwy. Cefais sgwrs hyfryd gyda rhywun o’r enw Sarah, a rannodd ei phrofiad o weithio mewn amgylchedd lle mae dynion yn dominyddu. Rhoddodd hynny fewnwelediad gwirioneddol a hwb i mi.” 

Roedd bod yn rhan o’r gystadleuaeth wedi ehangu dealltwriaeth Amiyah o seiberddiogelwch. Cafodd ei hamlygu i ystod ehangach o fygythiadau a gwendidau ar-lein, a’i hannog i feddwl yn fwy creadigol—ac yn annibynnol hefyd. Ar yr un pryd, pwysleisiodd mor hanfodol yw cyfathrebu a gwaith tîm. 

“Fe wnaeth i mi feddwl yn fwy creadigol—ac yn annibynnol hefyd.” 

Anogodd y gystadleuaeth Amiyah hefyd i ystyried gyrfa ym maes seiber. Er bod rhai o aelodau’r tîm eisoes â diddordeb cryf yn y pwnc, rhoddodd y digwyddiad gyfle iddynt i gyd archwilio’r maes ymhellach a datblygu sgiliau newydd nad oeddynt fel arfer yn rhan o’r cwricwlwm ysgol. 

“Rhoddodd y cyfle i mi archwilio seiber ymhellach a datblygu sgiliau nad oedd fy ysgol yn eu cynnig.” 

I Amiyah, nid sgiliau technegol yn unig oedd y profiad—ond cyfeillgarwch hefyd. O’r eiliad y daeth hi a’i thîm ar y trên i Gasnewydd, daethant yn agosach at ei gilydd, gan ddathlu llwyddiannau, cefnogi ei gilydd mewn ffyrdd annisgwyl, a ffurfio bond a wnaeth y profiad yn arbennig iawn. Hyd yn oed y rhai nad oedd ganddynt ddiddordeb mawr mewn seiber i ddechrau, dywedasant fod y gystadleuaeth yn werth chweil. 

I unrhyw ferched sy’n meddwl cymryd rhan, mae gan Amiyah gyngor syml: gwnewch hynny. Mae’r gystadleuaeth yn creu atgofion parhaol, yn adeiladu hyder, ac yn ffurfio cysylltiadau sy’n ymestyn ymhell y tu hwnt i’r digwyddiad ei hun. 

“Gwnewch hynny. Byddwch yn creu atgofion fydd yn para oes a gwneud ffrindiau na fyddwch byth yn eu hanghofio.” 

Wrth adlewyrchu ar ei thaith, mae Amiyah yn glir ynghylch yr effaith: 

“Mae’r gystadleuaeth CyberFirst wedi fy ysbrydoli’n wirioneddol i fi a’m cyd-aelodau o dîm DALA, Lexy a Daisy. Gobeithiaf y bydd mwy o ferched yn cymryd rhan y tro nesaf.”